Првата Глобална Женска Лидерска Конференција во Македонија ,,Јас Сум Жена” се одржа на 20 и 21 Јули, 2022 година во МКЦ-Кино Фросина, Скопје, во организација на 3 млади жени, ентузијасти за унапредување на правата и положбата на жените воМакедонија: Ана Дукоска, основачка на иницијативата „Македонците во светот“, Илина Пејоска Затуроски, UI/UX дизајнерка и сопственичка на мал бизнис БЕБЕ БОКС ДООЕЛ и Катерина Климовска, претседателка на ИСЛАА-алумни асоцијацијата на школата за млади лидери Иванов.

13 исклучително реализирани македонски жени од многуте во Македонија и надвор од неа, на 4 панел дискусии, разговараа за предизвиците и проблемите со кои секојдневно се соочува една Македонка во Македонија и надвор од неа, го пренесоа своето знаење, искуство и понудија идејни решенија за поголема интеграција и еманципација на секоја жена во Македонија.

Конференцијата беше отворена со видео биографии на Македонки низ историјата кои допринеле за подобро место на жената во општеството во Македонија, а беше затворена со изложба на рачни изработки на македонски занаетчики: Македонски Рубин и Охридски Бисери Ристески на 20ти Јули и изложба на ексклузивни модели со македонски мотиви изработени од дизајнерката Силвија Алшар на 21ви Јули.